21 апрельдә “Мин татарча сөйләшәм” чарасы кысаларында Бөтендөнья татар яшьләре форумы “Татар-дозор-2013” дип аталган квест уздыра.
Маҗаралы уен быел дүртенче тапкыр үткәрелә, шуңа күрә катнашучылар саны елдан ел арта бара. Моңа гаҗәпләнәсе дә юк, чөнки уен шактый мавыктыргыч һәм җиңүчеләргә тапшырыласы бүләкләр дә мотивация өстәп тора. Квест катнашучылары билгеләнгән маршрут буенча узып, төрле-төрле биремнәрне үтиләр.
Квестта катнашыр өчен мәктәп укучылары, студентлар иҗади коллективлары һәм дә татар телен, маҗараларны яратучы гади кешеләр чакырылды. Ләкин уенда катнашу өчен берничә шартны үтәү мәҗбүри:
1.Командада 7 кеше булуы зарур
2.“Татарстанның дәүләт телләре турында” канунын бозучы оешмалар исеменә 5 хат язу.
3.Татар телендә хата белән язылган элмә такталар, реклама баннерлары, юл күрсәткечләре һ.б. фотосүрәтләрен туплау.
4.“Мин татарча сөйләшәм”, “Татарлар башка планетада”, “2050 елда татарлар” яки “Татарлар турында телсез кино” темаларына багышланган 3-4 минутлык видеоролик төшерү.
Нәтиҗәдә, уенның финал өлешенә 10 команда арасыннан 6сы сайлап алынды. Финалга чыккан катнашучылар ААҖ “Вымпелком” ширкәте тәкъдим иткән бүләкләр өчен көрәшәчәк.
Уенда катнашу өчен командаларда фотоаппарат, видеокамера булу зарур. Шулай ук команда вәкилләре “Мин татарча сөйләшәм” логотибы төшерелгән футболкаларда маршрут буйлап йөрер дип көтелә.
Чара 21 апрельдә, Бауман урамында 14 сәгатьтә башлана. Җиңүчеләр 26 апрель көнне узачак “Мин татарча сөйләшәм” концертында бүләкләнәчәк, дип вәгъдә итә Бөтендөнья татар яшьләре форумы вәкилләре.
Комментариев нет:
Отправить комментарий